අද ඔයාගේ හිතට ලොකු බරක් දැනෙනවා නම්, දැනගන්න දෙවියන්වහන්සේට ඕනෙ ඔයාගේ හදවතට සැනසීම දෙන්න කියලයි.
“වෙහෙසවෙන්නාවූ, බර උසුලන්නාවූ සියල්ලෙනි, මා වෙතට එන්න, මම නුඹලාට සහනය දෙන්නෙමි.”
— මතෙව් 11:28
උන්වහන්සේගේ ඒ වචනවලින්ම අපිට තේරෙනවා උන්වහන්සේ අපිට කොච්චර ආදරෙයිද, අපේ බර අරගන්න කොච්චර ආසයිද කියලා.
ඉතින් අපේ මහන්සියට, ජීවිතයේ බරට උන්වහන්සේ ළඟ තියෙන විසඳුම මොකක්ද?
ඒක තමයි උන්වහන්සේ ළඟට එන එක. නිකම්ම උන්වහන්සේ ළඟට එන්න.
ඔව්, ඒක ඇත්තටම ඒ තරම් සරලයි!
දැන්ම වුණත්, ඔයා මේ දේ කියවන ගමන්, ඔයා ජේසුස් වහන්සේගේ පාමුල වාඩි වෙලා, උන්වහන්සේගේ සන්නිධානයේ සමාදානයෙන් ඉන්නවා කියලා හිතින් මවාගන්න.
උන්වහන්සේ කියනවා, “මාගේ වියගහ ඔබ පිටට ගන්න… මගේ වියගහ සැහැල්ලුයි, පීඩා රහිතයි” කියලා.
පොඩ්ඩක් හිතන්න, උන්වහන්සේගේ වියගහ ගන්න නම්, මුලින්ම ඔයා දැනට උසුලන් ඉන්න බර බිමින් තියන්න ඕනෙ නේද?
- ඔයාගේ දරුවා ගැන තියෙන ඒ ලොකු කෙනෙහෙලිකම…
- මදි වෙයි කියලා තියෙන ඒ බිය…
- අනාගතය සපයාගැනීම ගැන තියෙන බර…
- වැරදි තීරණයක් ගනියිද කියන බිය…
- අනිත් අයට තමන්ව ඔප්පු කරන්න තියෙන වෙහෙස…
දැන්ම දෙවියන්වහන්සේට ඕනෙ ඔයාගේ ඒ බර නිදහස් කරන්නයි. උන්වහන්සේ ඔයාට කියනවා: “ඔය ඔසවාගෙන ඉන්න බර තියන්න ඕනෙ මාගේ පාමුලයි.”
ඉතින් තනියම උත්සාහ කරලා, තමන්ගේම ශක්තියෙන් මේ ගමන යන්න හදන්න එපා. ලෝකය දිහා බලලා “මේ හැමදේම මගේ පිටයි තියෙන්නේ” කියලා හිතලා හිත රිදෝගන්න එපා.
නීතියේ බර වෙනුවට අනුග්‍රහයේ වියගහ
ජේසුස් වහන්සේ එදා මේ වචන කියද්දී, ඒ කතා කළේ ආගමික නීතිරීතිවල බරින් පීඩා විඳපු මිනිස්සුන්ටයි.
එදා නීතිය කියන්නේ හැමදේම තමන්ගේම ශක්තියෙන් කරන්න ඕනෙ, ලකුණු දාගන්න ඕනෙ කියන සිස්ටම් එකක්. ආගමික නායකයෝ මිනිස්සුන්ගේ පිට උසුලන්න බැරි තරම් නීති පටවලා තිබුණා.
ඉතින් ජේසුස් වහන්සේ “මා වෙතට එන්න” කියලා කිව්වේ, ඒ වෙහෙසකර නීතිරීතිවලින් මිනිස්සුන්ව නිදහස් කරන්නයි. උන්වහන්සේ දුන්නේ තව තවත් නීති පටවන වියගහක් නෙවෙයි — අනුග්‍රහයේ වියගහයි!
“අපට විරුද්ධව තිබුණාවූ අඥා ලියවිල්ල උන්වහන්සේ මකා දමා, කුරුසියේ ඇණ ගසමින් ඉවත් කළසේක.”
— කොලොස්සි 2:14
උන්වහන්සේ පිහිටෙව්වේ අලුත් ගිවිසුමයි. ඒක අපේ දුර්වලකම් මත නෙවෙයි, උන්වහන්සේගේ වෙනස් නොවන ආදරය සහ නොලැබිය යුතු අනුග්‍රහය මත පදනම් වූවක්!
ජේසුස් වහන්සේගේ වියගහ සැහැල්ලු ඇයි?
සමහරවිට ඔයා හිතනවා ඇති, “මොකක්ද මේ වියගහ කියන්නේ? ඒක සැහැල්ලු වෙන්නේ කොහොමද?” කියලා.
ඒක හරිම ලස්සන ආත්මික චිත්‍රයක්!
වියගහක් කියන්නේ ගොවිතැනේදී හරක් දෙන්නෙක්ව එකට බැඳලා කුඹුර හාන්න ගන්න ලී රාමුවට. සාමාන්‍යයෙන් කරදඬු උස්සපු නැති පොඩි හරකෙක්ව බඳින්නේ, ලොකු, ශක්තිමත්, අත්දැකීම් තියෙන ලොකු හරකෙක් එක්කයි.
ජේසුස් වහන්සේගේ වියගහ සැහැල්ලු වෙන්නේ අන්න ඒ නිසයි! මොකද ඒ බරෙන් වැඩි කොටසක් උසුලන්නේ ඔයා නෙවෙයි — ශක්තිමත් ජේසුස් වහන්සේයි.
ඔයා කවදාවත් තනිවෙන්නේ නෑ. ජීවිතයේ මොන ප්‍රශ්නය ආවත් ඔයා තනියම නෙවෙයි මුහුණ දෙන්නේ. උන්වහන්සේ ඔයාගේ ළඟින්ම ඉන්නවා. දැන් බර තියෙන්නේ ඔයාගේ කරපිට නෙවෙයි, උන්වහන්සේගේ කරපිටයි!
අනුග්‍රහයේ නියම තාලය (Rhythm of Grace)
දැන් ඒකෙන් අදහස් වෙන්නේ නෑ ඔයා මුකුත්ම නොකර ඉන්න ඕනෙ කියලා. ඔයා රක්ෂාවට යනවා, තීරණ ගන්නවා, පවුල ගැන බලනවා.
ඒත් වෙනස මේකයි: “හැමදේම මගේ පිටයි තියෙන්නේ” කියන පීඩනයෙන් නෙවෙයි ඔයා ඒක කරන්නේ. ඔයා ජේසුස් වහන්සේ එක්ක එකට බැඳිලා ඉන්නේ. උන්වහන්සේ තමයි ඔයාට ශක්තිය දෙන්නේ.
ගමන යද්දී ඔයාගේ බෙල්ලට තදක් දැනෙනවා නම්, හිතට ලොකු මහන්සියක් දැනෙනවා නම්, ඒකෙන් තේරුම් ගන්න ඔයා උන්වහන්සේට වඩා ඉස්සරහට යන්න හදලා තමන්ගේම ශක්තියෙන් වැඩ කරන්න පටන් අරන් කියලා.
ඒ වෙලාවට කරන්න ඕනෙ තව තවත් මහන්සි වෙන එක නෙවෙයි, ආයෙත් ජේසුස් වහන්සේට ළංවෙන එකයි.
මේ නියම තාලය පුරුදු වෙන්න:
- ✅ උන්වහන්සේ ඉදිරියට යද්දී ඔයත් යන්න.
- ✅ උන්වහන්සේ නතර වෙද්දී ඔයත් නතර වෙන්න.
- ✅ උන්වහන්සේ මඟ පෙන්වද්දී ඔයා පස්සෙන් යන්න.
නියම සහනය තියෙන්නේ ප්‍රශ්න නැති ජීවිතයක නෙවෙයි — ජේසුස් වහන්සේගේ අනුග්‍රහයේ වියගහ යටතේ, උන්වහන්සේගේ මඟපෙන්වීමෙන් පියවරෙන් පියවර යන ජීවිතයකයි!
මෙම ලිපිය පූජ්‍ය ජෝසෆ් ප්‍රින්ස් (Pastor Joseph Prince) තුමාගේ දිනපතා දෙව්සඳහන (Daily Devotion) ඇසුරෙන් සකස් කරන ලද්දකි.
