උන්වහන්සේගේ අප්‍රමාණ සැපයුමෙන් ලබාගන්න
සමහර අය එක්ක කාලය ගත කළාට පස්සේ ඔයාට හරිම සෑහීමක්, අලුත් ජීවයක් දැනෙන අතරේ, තවත් සමහර අය එක්ක ඉද්දී ඔයාගේ මුළු ශක්තියම උරාගන්නවා වගේ දැනෙන බව ඔයා කවදාහරි නිරීක්ෂණය කරලා තියෙනවද?
මේක මෙහෙම හිතන්න. ඔයාට තියෙන හැම සම්බන්ධතාවයක්ම දෙන්නා එකතුවෙලා පවත්වාගෙන යන බැංකු ගිණුමක් වගෙයි. දැනුවත්ව හෝ නොදැනුවත්ව දෙන්නම ඒකට තැන්පත් කිරීම් (Deposits) සහ ලබාගැනීම් (Withdrawals) නිතරම කරනවා.
තැන්පත් කිරීමක් (Deposit) කියන්නේ විශ්වාසය, උණුසුම, සහ හොඳ සබඳතාවයක් ගොඩනඟන ඕනෑම දෙයකටයි. ඒක සති කිහිපයකට කලින් ඔයා නිකමට වගේ කියපු දෙයක් මතක තියාගෙන ඒ ගැන ආයෙත් අහන යාළුවා වෙන්න පුළුවන්. නැත්නම්, තමන්ගේ නමට ගන්න ලේසි කම තිබියදීත්, ඔයා කරපු කැපවීම අගය කරලා ඔයාට ඒ ගෞරවය දෙන රක්ෂාවේ යාළුවා වෙන්න පුළුවන්.
ඒවා හරිම පුංචි දේවල්. ඒත් කාලයත් එක්ක ඒවා එකතු වෙලා ලොකු වටිනාකමක් ගොඩනඟනවා.
අනිත් පැත්තෙන් ලබාගැනීමක් (Withdrawal) කියන්නේ ගොඩනඟපු විශ්වාසය අඩු කරන ඕනෑම දෙයකටයි. සැර වචනයක්… දුන්න පොරොන්දුවක් කැඩීම… අනිත් කෙනා ගැන ඇත්තටම හොයා නොබලන කාලයක්… මේවා හැමවෙලේම හිතාමතා කරන දේවල් නෙවෙයි. ඒත් ජීවිතයේ එක එක පීඩනයන් එක්ක, අපි හැමෝටම හොඳින් ඉන්න බැරි අමාරු කාලවල් එනවා.
සම්බන්ධතාවලට කරන තැන්පත් කිරීම්
ඒත් මට ඔයා එක්ක හරිම ප්‍රායෝගික දෙයක් බෙදාගන්න පුළුවන්ද?
ඔයාට ඔයාගේ සම්බන්ධතා සාර්ථකව පවත්වාගෙන යන්න ඕනෙ නම්, ඔයා හිතාමතාම ඒවට තැන්පත් කිරීම් කරන්න ඕනෙ. මොකද ගොඩක් අයට ලැබෙන තැන්පත් කිරීම්වලට වඩා, තමන්ගෙන් අයින් වෙන දේවල් සහ වෙන රිදවීම් හොඳටම දැනෙන නිසා.
මේ තැන්පත් කිරීම් මොන වගේද?
ඔයාගේ යාළුවන් ගැන හොයා බලමින්, එයාලා වෙනුවෙන් යාච්ඤා කරමින් ඔයාගේ මිතුදම් වෙනුවෙන් ආයෝජනය කරන්න. එයාලගේ ජීවිතයේ විශේෂ අවස්ථා සමරන්න කාලය වෙන් කරන්න. මුලින්ම ඒ සම්බන්ධතාවය ගොඩනඟන්න උදව් වුණු ඒ පුංචි දේවල් දිගටම කරන්න.
විවාහය ගැන කතා කරද්දී, මේ තැන්පත් කිරීම් තවත් හුඟක් වැදගත් වෙනවා. මොකද මේ බැංකු ගිණුම වැඩියෙන්ම පරීක්ෂාවට ලක්වෙන්නේ එතැනදී නිසයි. ඔයාලා එකට ජීවත් වෙනවා. එකිනෙකාගේ අඩුවාඩු, දුර්වලකම් හොඳටම දකිනවා. ජීවිතයෙන් එන හැම අභියෝගයකටම මුහුණ දෙමින් අමාරු කාලවල් පසුකරනවා.
අන්න ඒ නිසයි මගේ ජීවිතයේදී, මගේ බිරිඳ වන වෙනි (Wendy) සමඟ තියෙන ගිණුමට නිතරම තැන්පත් කිරීම් කරන්න මම උත්සාහ කරන්නේ. සමහර වෙලාවට මම ඇය ළඟට ගිහින්, ඇයව බදාගෙන, මම ස්තූතිවන්ත වෙන දෙයක් කියනවා: “අද ඒ දේ කරපු විදිහට ගොඩක් ස්තූතියි” වගේ දෙයක්. නැත්නම් නිකම්ම ඇගේ අත අල්ලාගෙන, “අපි දෙන්නා එකතු වෙලා මේ දේ කරන්න ලැබුණු එක ගැන මට හරිම සතුටුයි” කියලා කියනවා.
ඒකට ලොකු වෙලාවක් යන්නේ නැහැ. ඒත් මම තේරුම් අරන් තියෙනවා, විශාල දේවල්වලට වඩා අපේ සම්බන්ධතාවය නිරෝගීව තියන්නේ අන්න ඒ වගේ ඉක්මන් නැති, පුංචි මොහොතවල් කියලා. ආමෙන්?
ජේසුස් ස්වාමීන්වහන්සේව කේන්ද්‍රය කරගන්න
දැන් මට මේක තව ටිකක් ඉදිරියට ගෙනියන්න ඕනෙ. ඕනෑම කෙනෙකුට තමන්ගේ සම්බන්ධතාවලට හිතාමතා තැන්පත් කිරීම් කරන්න පුරුදු වෙන්න පුළුවන් වුණත්, ඇදහිලිවන්තයෙක් විදිහට ඔයාට කරන්න පුළුවන් ඊටත් වඩා හුඟක් වටිනා දෙයක් තියෙනවා.
ඒ තමයි, අපේ ජේසුස් ස්වාමීන්වහන්සේව හැම සම්බන්ධතාවයකම කේන්ද්‍රය කරගැනීම!
ඔයාගේ ජීවිතයේ ඉන්න අයගෙන් ශක්තිය ලබාගන්න හදනවා වෙනුවට, ජේසුස් ස්වාමීන්වහන්සේගෙන් ලබාගන්න පුරුදු වෙන්න. ඔයාට දුකක්, බයක්, නැත්නම් අමාරුකමක් දැනෙද්දී ඔයා මුලින්ම යන කෙනා උන්වහන්සේ වෙන්න ඉඩදෙන්න. අවිශ්වාසය සහ අවිනිශ්චිත බවක් ආවම උන්වහන්සේගේ වචනය ඔයාගේ නුගුල (Anchor) කරගන්න.
ඔයාගේ ජීවිතයේ ඉන්න විශ්වාසවන්තම කෙනාට පවා සීමාවක් තියෙනවා. එයාලා කොච්චර ත්‍යාගශීලී වුණත්, ඉවසීම තිබුණත්, කොච්චර ආදරණීය සහකරුවෙක් හෝ හොඳම යාළුවෙක් වුණත්, එයාලා හැමෝම ශක්තිය ලබාගන්නේ සීමිත ප්‍රමාණයකින්.
එයාලට දෙන්න තරම් ශක්තියක් නැති මොහොතවල් එනවාමයි. අන්න ඒ වගේ වෙලාවට, ඔයාගේ ප්‍රධාන ශක්තිය, ආරක්ෂාව, සහ අයිතිවාසිකම ඔයා හෙව්වේ අනිත් අයගෙන් නම්, ඔයා කනගාටුවට සහ කලකිරීමට පත්වෙනවා.
මට මේක කියන්න ඕනෙ: දෙවියන්වහන්සේ අපව නිර්මාණය කළේ එකිනෙකා සමඟ සම්බන්ධතා පවත්වන්න කියන එක මම විශ්වාස කරනවා. ආදරය කරන්න සහ ආදරය ලබන්න උන්වහන්සේ අපේ ජීවිතවලට මිනිස්සුන්ව දෙනවා. ඒත් උන්වහන්සේගේ ආදරයට විතරක් උසුලන්න පුළුවන් ඒ ලොකු බර මනුෂ්‍ය ආදරය මත තියන්න උන්වහන්සේ කවදාවත් අදහස් කළේ නැහැ.
උන්වහන්සේගේ නිමකළ නොහැකි සැපයුම
ඔයයි මමයි වගේ නෙවෙයි, අපේ ජේසුස් ස්වාමීන්වහන්සේගේ සැපයුම අප්‍රමාණයි! නිම කරන්න බැහැ! උන්වහන්සේ කවදාවත් හිස් වෙන්නේ නැහැ. උන්වහන්සේගේ අනුකම්පාව හැම උදෑසනකම අලුත් වෙනවා. ඇත්තටම, ඔයා උන්වහන්සේගෙන් ලබාගන්න තරමට, ලැබෙන සැපයුම තවත් වැඩිවෙනවා!
ලිඳ ළඟදී සමරීය ස්ත්‍රිය සමඟ අපේ ස්වාමීන්වහන්සේ කරපු කතාබහ ගැන හිතන්න. යොහන් 4 හි කියන්නේ උන්වහන්සේ ගමන නිසා මහන්සියෙන් හිටපු බවයි. ඒත් ඇයට සේවය කළාට පස්සේ, ගෝලයන් ඇවිත් බලද්දී උන්වහන්සේ හිටියේ නව ශක්තියකින් පිරිලා. උන්වහන්සේ එයාලට මෙහෙම කිව්වා:
“නුඹලා නොදන්නා ආහාරයක් කෑමට මට තිබේ.”
— යොහන් 4:32
ඇය උන්වහන්සේගෙන් ශක්තිය ලබාගත්තාට පස්සේ උන්වහන්සේ හිස් වුණේ නැහැ, ඒ වෙනුවට උන්වහන්සේ නැවත පිරුණා!
ඔයා තේරුම් ගන්න ඕනෙ දේ මෙන්න මේකයි: ඔයා ස්වාමීන්වහන්සේ සමඟ තියෙන සම්බන්ධතාවය ගොඩනඟාගෙන උන්වහන්සේ සමඟ කාලය ගත කරද්දී, ඔයාගේ ඇතුළත ලොකු වෙනසක් සිද්ධ වෙනවා. දෙවියන්වහන්සේට විතරක් දෙන්න පුළුවන් දේ මනුස්සයන්ගෙන් බලාපොරොත්තු වෙන එක ඔයා නතර කරනවා. උන්වහන්සේට විතරක් වෙන්න පුළුවන් දේ අනිත් අයගෙන් බලාපොරොත්තු වෙන එක නතර කරනවා.
ඒක එතනින් නතර වෙන්නෙත් නැහැ. උන්වහන්සේට ඔයාව පුරවන්න ඉඩදුන්නාම, ඔයා අනිත් අයගෙන් ශක්තිය ලබාගන්න කෙනෙක් වෙනවා වෙනුවට, එයාලටම ආශීර්වාදයක් වෙන කෙනෙක් බවට පත්වෙනවා!
ඔයාගේම හිස්කමෙන් අනිත් අයට දෙන්න හදද්දී තමයි ඔයා ලොකු වෙහෙසකට පත්වෙන්නේ. ඒත් ස්වාමීන්වහන්සේගෙන් ලැබෙන පූර්ණකම ඔයා අත්දකිද්දී, උන්වහන්සේගෙන් ලැබුණු ඒ පූර්ණකම අනිත් අය වෙතට ගලාගෙන යන්න (Overflow) පටන් ගන්නවා.
අනිත් අය වැටිලා ඉද්දී එයාලව ධෛර්යමත් කරන්න ඔයාට පුළුවන් වෙනවා. කේන්ති ගන්නේ නැතුව එයාලා එක්ක ඉවසීමෙන් කටයුතු කරන්න පුළුවන් වෙනවා. එයාලා එක්ක තියෙන සම්බන්ධතාවයේ ඒ බැංකු ගිණුමට ලොකු තැන්පත් කිරීමක් කරන්න ඔයාට පුළුවන් වෙනවා.
ස්වාමීන්වහන්සේගෙන්ම පිරුණු හදවතක්! ඒක තමයි ඕනෑම තැනකට, ඕනෑම මිතුදමකට, ඕනෑම විවාහයකට ඔයාට අරන් යන්න පුළුවන් ලොකුම ආශීර්වාදය.
අද අපේ මේ කතාබහෙන් ලබපු සරල ඒත් ප්‍රායෝගික සත්‍යය, ඔයාගේ සම්බන්ධතාවල තියෙන ඕනෑම ගැටුමක්, අසහනයක් දුරු කරලා, ඒවා ආශීර්වාදවත් කරලා සඵල කරන්න ස්වාමීන්වහන්සේ පාවිච්චි කරයි කියලා මම යාච්ඤා කරනවා!
මෙම ලිපිය පූජ්‍ය ජෝසෆ් ප්‍රින්ස් (Pastor Joseph Prince) තුමාගේ දිනපතා දෙව්සඳහන (Daily Devotional) ඇසුරෙන් සකස් කරන ලද්දකි.
